Ofbeldi gegn innflytjendum

Meiri hætta á að verða fyrir ofbeldi

Ýmis atriði valda því að fólk af erlendum uppruna er í meiri áhættu á að verða fyrir ofbeldi en fólk af íslenskum uppruna.

Til dæmis:

• Skortur á tungumálakunnáttu.
• Félagsleg einangrun.
• Skortur á upplýsingum.
• Lítil fjárráð.
• Menningarviðhorf.
• Ótti við að vera vísað úr landi.

Innflytjendur sem verða fyrir ofbeldi velja oft að tilkynna það ekki af ótta við að missa dvalarleyfi sitt. Þetta getur einnig hindrað þá til að nálgast ýmsa þjónustu.

Algengar aðferðir

Einangrun

• Makar sem beita ofbeldi gætu hindrað þig í að læra íslensku eða hafa samskipti við annað fólk, sérstaklega fólk með sama menningarlegan bakgrunn.
• Maki sem beitir ofbeldi gæti reynt að láta reka þig úr vinnunni eða tilkynnt að þú sért ekki með tilskyld leyfi til þess að einangra þig félagslega og fjárhagslega.

Hótanir

• Að láta vísa þér úr landi eða að draga til baka umsókn um ríkisborgararétt ef þú tilkynnir ofbeldi.
• Að eyðileggja mikilvæg persónuleg gögn eins og vegabréf, ökuskírteini eða sjúkratryggingu.
• Að maðurinn fái forsjá barnanna vegna þess að þú sért af erlendum uppruna eða að hann muni segja yfirvöldum að þú sért óhæf móðir.
• Maki gæti fylgt hótunum eftir með því að draga til baka, seinka umsókn eða leggja ekki fram skjöl um búsetu.

Ekki óttast hótanirnar!

Það þarf ekki að óttast hótanir ofbeldismanna um að réttindi þín verði skerð. Allt það sem opinberir aðilar ákvarða, til dæmis réttur til dvalar á Íslandi eða hvort foreldrið fari með forsjá barns, fara þeir eftir lögum, skoða aðstæður og atvik hvers máls fyrir sig og byggja ákvörðun sína á því. Niðurstaðan fer því aldrei eftir vilja eða orðum eins einstaklings.

Lesa meira um birtingarmyndir á ofbeldi

Íslensk lögregla

Hér á landi nýtur lögreglan mikils trausts íbúa og fólki er óhætt að leita til lögreglu ef það telur sig hafa orðið fyrir broti eða ofbeldi. Íslenska lögreglan starfar samkvæmt lögum og leitast við að aðstoða alla sem búa á Íslandi, óháð því hvort þeir eru íslenskir ríkisborgarar eða ekki. Íslenska lögreglan hefur engin sérstök tengsl við lögregluna í þínu heimalandi.

Þú hefur rétt á því að fá túlk, þér að kostnaðarlausu, hjá lögreglu og öðrum opinberum stofnunum, eins og heilsugæslunni.

Þú getur fengið aðstoð með því að hringja í 1-1-2 eða gegnum netspjall á þessari síðu. Þú getur líka fengið að tala við lögregluþjón í vernduðu umhverfi á þolendamiðstöðvum á nokkrum stöðum á landinu. Þar er einnig boðið upp á ókeypis ráðgjöf og aðstoð:

• Bjarkarhlíð í Reykjavík
• Bjarmahlíð á Akureyri
• Sigurhæðir á Selfossi