Beint í efni

Byrlun

Þeir sem byrla öðrum lyf gera það til að stjórna þeim sem er byrlað og yfirleitt gert til að notfæra sér ástand viðkomandi, oft kynferðislega. 

Algengustu form byrlunar eru þegar lyf eru sett í áfengi fólks án þeirra vitundar eða þegar áfengi er neytt ofan í fólk eða hellt í það oft í þeim tilgangi að sljóvga það eða gera það meðvitundarlaust.

Svona inngrip í líf annarrar manneskju er líkamlegt ofbeldi og er alfarið á ábyrgð þess sem byrlar.

Við ættum alltaf að vera vakandi fyrir því ef einhver í kringum okkur er ekki í ástandi til að geta borið ábyrgð á sjálfum sé. Til dæmis ef fólk:

  • Virðist illa áttað, er ekki með það á hreinu hvar það er eða hvernig það komst þangað.
  • Talar óskýrt eða drafar.
  • Sýnir skyndilega breytingu í meðvitund.
  • Er meðvitundarlítið eða meðvitundarlaust.
  • Hefur ekki mátt til að hreyfa líkamann eða útlimi.

Ef þú sérð einhvern í þessu ástandi er mikilvægt að koma viðkomandi á öruggan stað þar sem hann getur aftur náð áttum í ró og næði eða fá aðstoð heilbrigðisstarfsfólks ef ástand viðkomandi gefur tilefni til.

Fólk veit yfirleitt ekki sjálft að því hefur verið byrlað. Vísbendingar um byrlun gætu verið að manneskjan: 

  • Veit ekki hvernig hún komst þangað sem hún er.
  • Man ekki eftir hvað hefur gerst.
  • Er marga daga að jafna sig líkamlega.

Ekki þarf alltaf að vera um byrlun að ræða þar sem lítil áfengisneysla ofan í líkamlega og andlega ofþreytu getur valdið svipuðum einkennum. Leiki grunur á byrlun er mikilvægt að segja frá og leita sér aðstoðar. Við bráðum einkennum og veikindum vegna byrlunar þarf að leita læknisaðstoðar.

Til greiningar á því hvort byrlun hafi átt sér stað þarf að fara fram rannsókn lögreglu. Sum lyf sem notuð eru til byrlunar eru fljót að skolast út úr líkamanum og því getur skipt máli að greina blóðsýni eins fljótt og hægt er eftir að grunur um byrlun vaknar.

Úrræði í boði

Skoða öll úrræði

Stígamót

Stígamót hjálpa öllum (konum, körlum og kynsegin fólki) sem hafa orðið fyrir kynferðislegu ofbeldi.

Neyðarmóttaka vegna kynferðisofbeldis

Neyðarmóttakan tekur á móti öllum þeim sem hafa orðið fyrir nauðgun, tilraun til nauðgunar eða öðru kynferðisofbeldi.

Neyðarmóttaka á Akureyri vegna kynferðisofbeldis

Neyðarmóttakan á sjúkrahúsinu á Akureyri tekur á móti öllum þeim sem hafa orðið fyrir nauðgun, tilraun til nauðgunar eða öðru kynferðisofbeldi.